ភ្នំពេញ៖ វ៉ាក់សាំង Sinovac ចំនួន ៣ លានដូសបន្ថែមបានមកដល់អាកាសយានដ្ឋានអន្តរជាតិភ្នំពេញនៅព្រឹកថ្ងៃអង្គារនេះ។ វ៉ាក់សាំងនេះត្រូវបានរាជរដ្ឋាភិបាលកម្ពុជាទិញពីសាធារណរដ្ឋប្រជាមានិតចិន ដើម្បីចាក់ជូនកុមារដែលមានអាយុ ចាប់ពីអាយុ ៦ ដល់ក្រោម ១២ឆ្នាំ។

រដ្ឋលេខាធិការក្រសួងសុខាភិបាល លោកស្រី យក់ សម្បត្តិ បានថ្លែងថាប្រទេសចិនគឺជាដៃគូដ៏រឹងមាំជាមួយកម្ពុជាក្នុងការប្រយុទ្ធប្រឆាំងការរីករាលដាលនៃជំងឺកូវីដ-១៩ ។

នៅខែក្រោយប្រទេសកម្ពុជារំពឹងថានឹងទទួលបានវ៉ាក់សាំងការពារជំងឺកូវីដ-១៩ ចំនួន ៣ លានដូសទៀតដែលចិនសន្យាថាជាអំណោយដល់ប្រជាជននៅក្នុងព្រះរាជាណាចក្រកម្ពុជា។

គិតមកដល់ពេលនេះកម្ពុជាទទួលបានវ៉ាក់សាំងប្រមាណ ៣៥,៥ លានដូសទាំងការទិញនិងការបរិច្ចាគ ក្នុងនោះរួមបញ្ចូលទាំងការបរិច្ចាគពី “ប្រទេសជាមិត្ត” ដូចជាប្រទេសចិន ប្រទេសជប៉ុន សហរដ្ឋអាមេរិក និងចក្រភពអង់គ្លេស។

រដ្ឋាភិបាលចិនបានជួយសម្រួលដល់ការផ្តល់វ៉ាក់សាំងចំនួន ២៦,៨ លានដូសនៅក្នុងប្រទេសកម្ពុជា។

គិតត្រឹមថ្ងៃច័ន្ទម្សិលមិញ ប្រទេសកម្ពុជាបានចាក់វ៉ាក់សាំងជូនពលរដ្ឋបាន ៨២,៥៣% នៃប្រជាជនសរុបចំនួន ១៦លាននាក់៕